“Me skal ha eit fylke der det er trygt og enkelt å ferdast.”

Dette er visjonen for samferdsla i Sogn og Fjordane. Kvar gong me som menneske går, syklar, reiser kollektivt, reiser med bil og sender/mottar varer og gods, er “me” samferdsle. Nesten kvar dag er samferdsla viktig for alle delar av samfunnsmaskineriet. Den bind saman byar, tettstader og distrikt og er naudsynt for næringslivet. Kort oppsummert gjeld hovudmåla for samferdsla i fylket omsyn til framkome, tryggleik og miljø.

Veg
Vegnettet skal tene person- og godstransporten i samfunnet og må vere utforma med tanke på alle trafikantgrupper: køyrande, kollektivreisande, syklande, gåande og dei som brukar andre framkomstmiddel. Det krev store ressursar å ta vare på og utvikle det eksisterande vegnettet til ein standard som samfunnet meiner er akseptabel med tanke på framkome, tryggleik og miljø.

Sams vegadministrasjon
Staten ved Statens vegvesen har ansvaret for riksvegane. Fylkeskommunane har ansvar for fylkesvegane og kommunane har ansvaret for dei kommunale vegane. Statens vegvesen har eit vegfagleg ansvar på fylkesvegnettet på vegne av fylkeskommunen. Sidan Statens vegvesen tener både staten og fylkeskommunane, blir dette kalla “sams vegadministrasjon”. Etter 1. jan 2010, då Sogn og Fjordane fylkeskommune tok over ansvaret for store delar av riksvegnettet i fylket, vart fylkeskommunen den største vegeigaren i Sogn og Fjordane med totalt 2575 km fylkesveg.

Kollektivtransport
Samferdsleavdelinga har ansvaret for kollektivtrafikktilbodet, skuleskyss, samt det offentlege båt- og busstilbodet i fylket. Ordningar som ”Trygt heim for ein 50-lapp”, lokale transporttilbod for ungdom, ungdomskort og fleksibel skuleskyss er etablert for å gje ungdom eit trygt og godt offentleg transporttilbod.