Vidaregåande opplæring for ungdom og vaksne er det største tenesteområdet i Sogn og Fjordane fylkeskommune. Fylket har 14 vidaregåande skular med plass til vel 4500 elevar. Dei fleste skulane gir tilbod innanfor både studieførebuande og yrkesfaglege utdanningsprogram. Fylkeskommunen har også ansvaret for at 708 lærlingar og lærekandidatar får vidaregåande opplæring i bedrift. I tillegg gir Fagskulen i Sogn og Fjordane undervisningstilbod til 156 studentar innan tekniske og maritime fag.

Opplæringsavdelinga med sine 34 tilsette har det administrative ansvaret for at ungdom og vaksne får ei kvalitativt god vidaregåande opplæring som fører fram til studiekompetanse, fag-/sveinebrev eller annan kompetanse. Avdelinga er organisert med ein administrativ stab i tillegg til 4 fagteam; Inntak og formidling, Kvalitet og utvikling, Fag- og vaksenopplæring og Eksamen og dokumentasjon.

God – betre – best er styringsdokumentet for den vidaregåande opplæringa i Sogn og Fjordane. Her finn ein mål, strategiar, innsatsområde og tiltak for perioden 2012–2015.