Planen vurderer kva konfliktpotensial vindkraftanlegg har, i forhold til ulike arealinteresser  langs kysten av Sogn og Fjordane. Planen omfattar areal i kommunane Selje, Eid, Vågsøy, Bremanger, Flora, Naustdal, Askvoll, Fjaler, Hyllestad, Solund og Gulen. Framlegg til plan, og vedlegg, finn du lenkje til nedanfor.

 

Vi vil gjerne ha innspel til planen sine retningsliner (kap. 4); kva er bra og dårleg med det som er foreslått? Og eventuelt framlegg til andre/alternative retningsliner. I tillegg vil vi gjerne ha innspel om eventuelle feil eller manglar ved omtalen av ulike arealinteresser (kap. 2 og 3).

 

Kap. 1 er eit bakgrunnskapittel, som mellom anna gjer greie for statleg politikk og kvifor vindkraftutbygging er ynskjeleg.

 

Planen sine kap. 2 og 3. omhandlar ulike arealinteresser som venteleg vert påverka av eventuell vindkraftutbygging. Kap. 3 inneheld også ei vurdering av samla konfliktpotensial i forhold til etablering av vindkraftanlegg i ulike geografiske område. Vurderingane baserer seg på det som er kjent av registreringar av arealinteresser, i dag, og kor vidt desse kan verte påverka av eventuell vindkraftutbygging. Desse vurderingane skal ikkje erstatte konsekvensutgreiingar av vindkraftanlegg, m.a. fordi det kan vere mange ukjente arealinteresser (dvs. som ikkje er registrert per i dag) og fordi avbøtande tiltak kan hindre/redusere konflikt i høve registrerte arealinteresser.

 

Kap. 4 drøftar og konkluderer fylkeskommunal politikk for vindkraftutbygging i Sogn og Fjordane. Her finn du retningsliner som avklarar kor fylkeskommunen i utgangspunktet finn det akseptabelt at vindkraftanlegg vert etablert.  Retningslinene gjev, i tillegg, innspel til m.a. kva typar utbygging fylkeskommunen ynskjer å prioritere, råd om innhald i konsekvensutgreiing av vindkraftanlegg og ynskjemål i forhold til statlege rammevilkår for vindkraftutbygging.

 

 

Vi gjer elles merksam på (jamfør plan- og bygningslova § 5-2, 2. avsnitt) at det har lege føre  to alternative utkast til plan (til høvesvis fylkesutvalsmøte 9. mars og 25. mai) , som ikkje vert lagt ut til offentleg ettersyn. Vurdering av konfliktpotensial er, for desse, annleis enn i det endelege høyringsutkastet. Du finn lenkje til dei alternative utkasta, nedanfor. Der finn du også lenkje til ein artikkel om planprosessen og alternative framlegg til plan.  

 

Alternativt utkast til plan, framlagt for fylkesutvalet 25.05.2010.
Om prosessen og alternative framlegg til plan