Marint verdiskapingsfond Sogn og Fjordane lyser ut midlar til delfinansiering av (for)prosjekt som skal bidra til ei meir berekraftig utvikling av akvakulturnæringa i fylket.
Grunnlag for utlysinga
I §2 om føremålet til fondet heiter det: «Fondet skal nyttast til aktivitetar retta mot følgjande tema:
Primært skal fondet nyttast til å finansiere tiltak/prosjekt som kan bidra til ei berekraftig utvikling av akvakulturnæringa. Med berekraftig meiner ein i denne samanhengen utfordringar knyta til lokalitetsval og –struktur, tilpassing til klimaendringar, motvirke sjukdom og smittespreiing, og opparbeide kunnskap om kva effekt oppdrettsfisk har på villfisk».
(For)prosjekta som søkjer delfinansiering skal vidare stø opp under målsetjingane i Arbeidsprogram for heilskapleg akvakulturforvalting (AHA!) som starta opp i 2011.
Overordna mål
Gjennom auka samhandling på tvers av forvaltningsorgana i fylket og i tett samarbeid med næringsinteressene, skal ein vidareutvikla potensialet for auka verdiskaping av akvakultur og næringar knyta til fritidsfiske etter villaks og sjøaure.
Delmål villaks og sjøaure
Vidareutvikle eit kunnskapsgrunnlag som skal bidra til ei meir heilskapleg forvalting av vill laks og sjøaure. Dette skal danne grunnlag for ei auka verdiskaping basert på turistfisket.
Delmål akvakultur
Gjennom ei berekraftig vidareutvikling vil vi legge til rette for auka verdiskaping for akvakulturnæringa i Sogn.
AHA! har bestemt at utlysinga skal rette seg mot prosjekt innan følgjande tema:
- Redusere smittepress og spreiing av lakselus og andre potensielle patogene organismar
- Førebygge rømming av oppdrettsfisk
- Avgrense reproduksjon av rømt laks i naturen
Det er positivt om hovudprosjektet går over fleire år, men det er ikkje eit absolutt vilkår.
Kven kan søke?
Primært samarbeidande bedrifter, kommunar, lag- og næringsorganisasjonar FoU-miljø
Krav om geografisk forankring i fylket
Tiltak og prosjekt som får støtte skal ha ei klar forankring i Sogn og Fjordane, og bidra til ei berekraftig forvaltning og/eller auka lokal verdiskaping.
Tildelingsmynde: Sogn og Fjordane fylkeskommune.
Innstilling og prioritering av prosjekt for tildeling av delfinansiering er lagt til arbeidsgruppa i AHA! som består av representantar frå statleg-, kommunal- og fylkeskommunal forvaltning, frå akvakulturnæring og villaksnæringa i fylket.
Finansiering
Tilskott frå Marint verdiskapingsfond skal som hovudregel maksimalt utgjere 50 % av det samla kapitalbehovet for prosjektet.
Grunnkapitalen i Marint verdiskapingsfond var på 11 millionar kroner i 2010, og vedtektene for fondet legger til grunn at fondet skal trappes ned over en periode på 6 år.
Send søknaden via e-post eller post til
postmottak@sfj.no
Sogn og Fjordane fylkeskommune
v/Lena Søderholm
Askedalen 2,
6863 Leikanger
- Søknadsfrist 23. mars 2012
