Planen speglar at Distrikts-Norge har andre utfordringar enn bynære strøk. Dei største utsleppa kjem frå nokre få, store produksjonsanlegg. Spreidd busetnad og store avstandar peikar ut transport som eit interessant tiltaksområde. Samstundes kan fylket tena mykje på å innføra utsleppsreduserande tiltak i landbruk og offentleg sektor.

 

Dei færraste tenkjer over kva utsleppsmengder som er forbunde med kjøp av forbruksvarer. Sidan varene ofte vert produsert i utlandet, tel ikkje utsleppa av klimagassar frå produksjonen med i den nasjonale rekneskapen. Tilnærminga til forbruk gjev eit betre grunnlag for å samanlikna utsleppmengdene frå innbyggjarane i byane og folk i distrikta.

 

På forbrukssida bør styresmaktene innføra tiltak som kan stimulera enkeltpersonar til å leva klimavenleg. Samstundes kan kvar og ein av oss yta eit positivt bidrag til klima og miljø ved å velja lokalproduserte varer og økologisk mat.

 

Forskarane er samde om at klimaendringane vil koma. For innbyggjarane i Sogn og Fjordane vil sårbarheten overfor framtidige endingar avhenga av kva tilpassingstiltak som vert innført. På dette området overlappar klimaplanen tiltak som i andre samanhangar typisk ville ha vore oppgåver innan beredskapsarbeid. I klimaplanen er det også lagt opp til ei omfattande kunnskapsutvikling i kommunane når det gjeld klimatilpassing.

 

Denne heilhetelege fylkesdelplanen er resultat av eit omfattande og inkluderande planarbeid med mange involverte aktørar. Det at mange kjenner eigarskap til dokumentet, lover bra for oppfølginga av planen og gjennomføringa av dei føreslegne tiltaka.

Last ned klima- og miljøplanen her.

Klimaplanen - fakta og bakgrunnstoff.